תנ"ך - שמואל - הכול
שמואל א פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא - שמואל ב פרק א ב ג ד ה ו ז ח ט י יא יב יג יד טו טז יז יח יט כ כא כב כג כד

האזנה לפרק זה

שמואל ב פרק כב

א וַיְדַבֵּר דָּוִד לַיהוָה, אֶת-דִּבְרֵי הַשִּׁירָה הַזֹּאת, {ס} בְּיוֹם הִצִּיל יְהוָה אֹתוֹ {ר}
מִכַּף כָּל-אֹיְבָיו, וּמִכַּף שָׁאוּל. {ס} ב וַיֹּאמַר: יְהוָה סַלְעִי וּמְצֻדָתִי, {ר}
וּמְפַלְטִי-לִי. ג אֱלֹהֵי צוּרִי, אֶחֱסֶה-בּוֹ; {ס} מָגִנִּי וְקֶרֶן יִשְׁעִי, {ר}
מִשְׂגַּבִּי וּמְנוּסִי, {ס} מֹשִׁעִי, מֵחָמָס תֹּשִׁעֵנִי. {ר}
ד מְהֻלָּל, אֶקְרָא יְהוָה; {ס} וּמֵאֹיְבַי, אִוָּשֵׁעַ. {ר}
ה כִּי אֲפָפֻנִי, מִשְׁבְּרֵי-מָוֶת; {ס} נַחֲלֵי בְלִיַּעַל, יְבַעֲתֻנִי. {ר}
ו חֶבְלֵי שְׁאוֹל, סַבֻּנִי; {ס} קִדְּמֻנִי, מֹקְשֵׁי-מָוֶת. {ר}
ז בַּצַּר-לִי אֶקְרָא יְהוָה, וְאֶל-אֱלֹהַי אֶקְרָא; {ס} וַיִּשְׁמַע מֵהֵיכָלוֹ קוֹלִי, וְשַׁוְעָתִי בְּאָזְנָיו. {ר}
ח ותגעש (וַיִּתְגָּעַשׁ) וַתִּרְעַשׁ הָאָרֶץ, {ס} מוֹסְדוֹת הַשָּׁמַיִם יִרְגָּזוּ; וַיִּתְגָּעֲשׁוּ, כִּי-חָרָה לוֹ. {ר}
ט עָלָה עָשָׁן בְּאַפּוֹ, וְאֵשׁ מִפִּיו תֹּאכֵל; {ס} גֶּחָלִים, בָּעֲרוּ מִמֶּנּוּ. {ר}
י וַיֵּט שָׁמַיִם, וַיֵּרַד; {ס} וַעֲרָפֶל, תַּחַת רַגְלָיו. {ר}
יא וַיִּרְכַּב עַל-כְּרוּב, וַיָּעֹף; {ס} וַיֵּרָא, עַל-כַּנְפֵי-רוּחַ. {ר}
יב וַיָּשֶׁת חֹשֶׁךְ סְבִיבֹתָיו, סֻכּוֹת; {ס} חַשְׁרַת-מַיִם, עָבֵי שְׁחָקִים. {ר}
יג מִנֹּגַהּ, נֶגְדּוֹ; בָּעֲרוּ, גַּחֲלֵי-אֵשׁ. {ס} יד יַרְעֵם מִן-שָׁמַיִם, יְהוָה; {ר}
וְעֶלְיוֹן, יִתֵּן קוֹלוֹ. {ס} טו וַיִּשְׁלַח חִצִּים, וַיְפִיצֵם; בָּרָק, ויהמם (וַיָּהֹם). {ר}
טז וַיֵּרָאוּ אֲפִקֵי יָם, יִגָּלוּ מֹסְדוֹת תֵּבֵל; {ס} בְּגַעֲרַת יְהוָה, מִנִּשְׁמַת רוּחַ אַפּוֹ. {ר}
יז יִשְׁלַח מִמָּרוֹם, יִקָּחֵנִי; {ס} יַמְשֵׁנִי, מִמַּיִם רַבִּים. {ר}
יח יַצִּילֵנִי, מֵאֹיְבִי עָז; {ס} מִשֹּׂנְאַי, כִּי אָמְצוּ מִמֶּנִּי. {ר}
יט יְקַדְּמֻנִי, בְּיוֹם אֵידִי; וַיְהִי יְהוָה מִשְׁעָן, לִי. {ס} כ וַיֹּצֵא לַמֶּרְחָב, אֹתִי; {ר}
יְחַלְּצֵנִי, כִּי-חָפֵץ בִּי. {ס} כא יִגְמְלֵנִי יְהוָה, כְּצִדְקָתִי; {ר}
כְּבֹר יָדַי, יָשִׁיב לִי. {ס} כב כִּי שָׁמַרְתִּי, דַּרְכֵי יְהוָה; {ר}
וְלֹא רָשַׁעְתִּי, מֵאֱלֹהָי. {ס} כג כִּי כָל-מִשְׁפָּטָו, לְנֶגְדִּי; וְחֻקֹּתָיו, לֹא-אָסוּר מִמֶּנָּה. {ר}
כד וָאֶהְיֶה תָמִים, לוֹ; {ס} וָאֶשְׁתַּמְּרָה, מֵעֲוֺנִי. {ר}
כה וַיָּשֶׁב יְהוָה לִי, כְּצִדְקָתִי; {ס} כְּבֹרִי, לְנֶגֶד עֵינָיו. {ר}
כו עִם-חָסִיד, תִּתְחַסָּד; {ס} עִם-גִּבּוֹר תָּמִים, תִּתַּמָּם. {ר}
כז עִם-נָבָר, תִּתָּבָר; {ס} וְעִם-עִקֵּשׁ, תִּתַּפָּל. {ר}
כח וְאֶת-עַם עָנִי, תּוֹשִׁיעַ; {ס} וְעֵינֶיךָ עַל-רָמִים, תַּשְׁפִּיל. {ר}
כט כִּי-אַתָּה נֵירִי, יְהוָה; {ס} וַיהוָה, יַגִּיהַּ חָשְׁכִּי. {ר}
ל כִּי בְכָה, אָרוּץ גְּדוּד; {ס} בֵּאלֹהַי, אֲדַלֶּג-שׁוּר. {ר}
לא הָאֵל, תָּמִים דַּרְכּוֹ; אִמְרַת יְהוָה, צְרוּפָה-- {ס} מָגֵן הוּא, לְכֹל הַחֹסִים בּוֹ. {ר}
לב כִּי מִי-אֵל, מִבַּלְעֲדֵי יְהוָה; {ס} וּמִי צוּר, מִבַּלְעֲדֵי אֱלֹהֵינוּ. {ר}
לג הָאֵל מָעוּזִּי, חָיִל; {ס} וַיַּתֵּר תָּמִים, דרכו (דַּרְכִּי). {ר}
לד מְשַׁוֶּה רגליו (רַגְלַי), כָּאַיָּלוֹת; {ס} וְעַל בָּמֹתַי, יַעֲמִדֵנִי. {ר}
לה מְלַמֵּד יָדַי, לַמִּלְחָמָה; {ס} וְנִחַת קֶשֶׁת-נְחוּשָׁה, זְרֹעֹתָי. {ר}
לו וַתִּתֶּן-לִי, מָגֵן יִשְׁעֶךָ; וַעֲנֹתְךָ, תַּרְבֵּנִי. {ס} לז תַּרְחִיב צַעֲדִי, תַּחְתֵּנִי; וְלֹא מָעֲדוּ, קַרְסֻלָּי. {ר}
לח אֶרְדְּפָה אֹיְבַי, וָאַשְׁמִידֵם; {ס} וְלֹא אָשׁוּב, עַד-כַּלּוֹתָם. {ר}
לט וָאֲכַלֵּם וָאֶמְחָצֵם, וְלֹא יְקוּמוּן; {ס} וַיִּפְּלוּ, תַּחַת רַגְלָי. {ר}
מ וַתַּזְרֵנִי חַיִל, לַמִּלְחָמָה; {ס} תַּכְרִיעַ קָמַי, תַּחְתֵּנִי. {ר}
מא וְאֹיְבַי, תַּתָּה לִּי עֹרֶף; מְשַׂנְאַי, וָאַצְמִיתֵם. {ס} מב יִשְׁעוּ, וְאֵין מֹשִׁיעַ; אֶל-יְהוָה, וְלֹא עָנָם. {ר}
מג וְאֶשְׁחָקֵם, כַּעֲפַר-אָרֶץ; {ס} כְּטִיט-חוּצוֹת אֲדִקֵּם, אֶרְקָעֵם. {ר}
מד וַתְּפַלְּטֵנִי, מֵרִיבֵי עַמִּי; תִּשְׁמְרֵנִי לְרֹאשׁ גּוֹיִם, {ס} עַם לֹא-יָדַעְתִּי יַעַבְדֻנִי. {ר}
מה בְּנֵי נֵכָר, יִתְכַּחֲשׁוּ-לִי; לִשְׁמוֹעַ אֹזֶן, יִשָּׁמְעוּ לִי. {ס} מו בְּנֵי נֵכָר, יִבֹּלוּ; וְיַחְגְּרוּ, מִמִּסְגְּרוֹתָם. {ר}
מז חַי-יְהוָה, וּבָרוּךְ צוּרִי; {ס} וְיָרֻם, אֱלֹהֵי צוּר יִשְׁעִי. {ר}
מח הָאֵל, הַנֹּתֵן נְקָמֹת לִי; {ס} וּמֹרִיד עַמִּים, תַּחְתֵּנִי. {ר}
מט וּמוֹצִיאִי, מֵאֹיְבָי; וּמִקָּמַי, תְּרוֹמְמֵנִי, {ס} מֵאִישׁ חֲמָסִים, תַּצִּילֵנִי. {ר}
נ עַל-כֵּן אוֹדְךָ יְהוָה, בַּגּוֹיִם; {ס} וּלְשִׁמְךָ, אֲזַמֵּר. {ר}
נא מגדיל (מִגְדּוֹל), יְשׁוּעוֹת מַלְכּוֹ; וְעֹשֶׂה-חֶסֶד לִמְשִׁיחוֹ {ס} לְדָוִד וּלְזַרְעוֹ, עַד-עוֹלָם. {ר}{ש}

תנ"ך - שמואל - הכול
שמואל א פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא - שמואל ב פרק א ב ג ד ה ו ז ח ט י יא יב יג יד טו טז יז יח יט כ כא כב כג כד

יש לך שאלה או הערה?